Traíñas.

A práctica deportiva de regatas na Ría de Vigo remóntase á segunda metade do século XIX, cando comezaron a celebrarse para conmemorar as festas parroquiais de Vigo. No 1886 xa participan nestas probas faluchos con 12 remeiros e patrón, pero non sería ata o 6 de agosto de 1900 cando as traíñas participan por primeira vez, sendo o primeiro premio de 125 ptas. para a "Niña" dirixida por Francisco Álvarez e o segundo para "Rosalía" capitaneada por José Casado.

A primeira embarcación de Redondela da que atopo datos é a de Chapela no periodo da I República. En setembro de 1933 o Club Marítimo de Vigo organiza unha regata de milla e cuarta en dúas quendas, na que participan: Ríos, Baiona, Meira e San Fausto de Chapela. Acadaría o 2ª posto por detrás de Meira, gañando un premio de 250 pesetas. En agosto de 1934 Chapela, baixo o mando de Feliciano Iglesias, participa no Campeonato de la Ría de Vigo, consistente en probas eliminatorias por parellas, sendo vencida por Rodeira. En agosto de 1935 tamén participaría na competición organizada polo Club Naútico de Vigo, quedando no 6º e último lugar. Coa Guerra Civil por medio, volvo a encontrar unha participación do Chapela nunha competición organizada polo Club Naútico de Vigo en 1946, tendo como Patrón a Floro Chapela.