O Monte Penide (Cedeira, Negros, Trasmañó e Cabeiro)

            Este monte destaca pola súa riqueza arqueolóxica. Nel podemos atopar petroglifos, máis de 30 mámoas catalogadas e o castro de Negros. Foi declarado Conxunto Histórico-artístico en 1970 e Ben de Interese Cultural en xullo do 2008. Para saber máis.

            Este conxunto ten a súa continuación no concello de Vigo.

¿Cómo chegar?

            Saír de Redondela en coche cara a Vigo. Deixamos á man dereita o acceso á estación de ferrocarril e, a uns 300 metros, xiramos á esquerda. Seguimos esta estrada ata ver os muros do colexio de Cedeira, chegando a un cruce que tomamos á dereita. Comezamos a subida ó monte Penide  pasando xunto ó Pazo de Torrecedeira (non pode ser visitado por ser de propiedade privada). A terceira pista do lado dereito condúcenos a un vello campo de futbol, coñecido como Campo da Rata. Nos arredores podemos atopar petroglifos e os restos dunha mámoa, así como un alto dende o que poderemos disfrutar de vistas á ría de Vigo. 

            Se continuamos a subida pola estrada, chegaremos á área de descanso Poza da Lagoa. Deixando as mesas á nosa esquerda seguiremos a pé por un sendeiro que nos levará ata a poza que da nome ó lugar. Seguimos o sendeiro rodeándoa e a escasos metros, na marxe dereita, atoparemos máis petroglifos.

            Voltamos co coche á estrada internándonos na parroquia de Trasmañó. Atopamos unha serie de cruces que tomaremos á esquerda, dereita e novamente á esquerda. Chegaremos a unha curva na que se atopa a Mámoa do Rei. Fixándonos nos arredores encontraremos numerosas mámoas, ata 30 catalogadas. Tomando un sendeiro cercano,  a uns centos de metros na marxe dereita, acharemos ademáis petroglifos e unha cruz gravada na Idade Media que da nome ó lugar, Chan da Cruz.

            Se preferimos facer todo o camiño a pé ou en bicicleta, unha opción sería a marcada no mapa adxunto na galería.

            Podemos completar a visita acercándonos ó Castro de Negros. Podemos ir a pé dende a Mámoa do Rei, a través de pistas, ou en coche dende Redondela. Nesta segunda opción dirixirémonos cara o Aeroporto de Peinador. Na parroquia de Negros, deixamos á esquerda o Bar Rosi e xiramos á dereita. Seguimos a estrada xirando no segundo cruce á esquerda. Chegaremos ata unha pista pola que subiremos ata o castro.

            Do castro tan só poderemos ver parte do muro exterior e depresións no terreo que indicarían a posible existencia de restos de vivendas. O lugar tamén conta con bonitas vistas ó val do río Maceiras

           Esta sería unha visita ó máis destacado, existen máis petroglifos e restos arqueolóxicos, pero a falta de sinalizacións dificulta explicar a súa ubicación dende un texto. Para saber máis.

           Ruta alternativa.

           Páxina con fotos dos petroglifos (en inglés).

           Outras Rutas.

Estado actual (2008).

            Nin os petroglifos nin as mámoas estan sinalizadas. O único panel existente, que indicaba a ubicación da Mamoa do Rei, foi destrozado pouco tempo despois da súa colocación. Pola súa parte, o Castro do Rei sofreu a colocación dunha torreta de alta tensión, dunha torre luminosa indicadora do aeroporto e de mesas e bancos de pedra.

Conclusións.

            Coa sinalización axeitada poderiase crear unha ruta de senderismo que unira tódolos puntos de interese.

Nota: O mapa e os calcos dos petroglifos foron facilitados na ruta guiada celebrada o 12 de outubro do 2008, organizada pola Consellería de Cultura e Deporte, e a do Medio Rural, agás  do calco da Poza da Lagoa no que aparecen formas humanas, recollida na páxina Internovas.   

Vídeo do Monte Penide en:

http://www.tu.tv/videos/petroglifos-en-el-monte-penide-redondel_1