Balonmán

Inicios

O primeiro equipo da vila foi o San Simón que, na categoría de cadetes, que xa en 1953 disputou a fase final do campionato provincial de balonmán A-7 do Frente de Juventudes de Falange. Este clube formado por “Los Arqueros” da OJE, nos anos 60 contaba con equipos de balonmán infantil e xuvenil, que como os anteriores participaban nos “Juegos Nacionales de la OJE”, o equipo xuvenil chegou a ser campión provincial, disputando o sector.

Nesta época para fomentar a afección a este deporte no noso concello, disputáronse varios partidos que soían celebrarse no campo de Santa Mariña. Como exemplo, dicir que en xuño de 1959 tivo lugar o Unión Sampaio-Salcedo pertencente á Copa Pontevedra. En setembro de 1960, con motivo da “I Exposición Móvil de Avance Provincial de 1940 a 1960”, xogaron o Vulcano, de Vigo, e o Teucro, de Pontevedra. En xuño de 1962, voltaron a enfrontarse o Vulcano e o Teucro, na final do “Trofeo Confecciones Carral”.

 

 Chapela

O equipo de Redondela con mellor palmarés é o S. D. Chapela. Debutou, estreando campo, en 1967 co nome Atlético de Chapela. No seu primeiro partido venceu ao Semca 11-8, formando: Castro, Paco, Ballesteros, Campos, Cándido, Casal, Senlle, Otero, Veiga, Collazo e Santorio. En 1969, sendo aínda equipo de Terceira, organizou o I Trofeo Occidente. Ascendeu a Primeira División en 1970 despois de vencer en Liga e Copa. O seu maior éxito foi o ascenso á Liga Asobal conseguido o 28 de abril de 1996, despois de proclamarse campión da División de Honra B. Na seguinte tempada (1996-97) ademáis deles xogarían nesta liga o Cangas, o Octavio de Vigo e o Teucro de Pontevedra. Conseguiu manterse na máxima categoría catro tempadas, chegando a gañarlle ao Barcelona no seu propio campo. A súa mellor tempada sería a 1997-1998 acadando o 7º posto na liga e caíndo eliminados en cuartos de final da Copa do Rey. Tristemente, despois de descender na 1999-2000 a acumulación de débedas levaron ó clube á desaparición. Por sorte, a praza do equipo en Primeira mantívose grazas a cesión a un novo clube o Deportivo Balonmán Chapela.

O equipo xuvenil masculino formouse a finais de 1967. En 1973, disputou por primeira vez a fase final do Campeonato Nacional.

 

 

Galería da S. D. Chapela (D.B.)

S. A. R.

O outro clube da vila é a Sociedade Atlética de Redondela (S.A.R.) fundado o 6 de agosto de 1963, si ben é certo que o equipo de balonmán non competiría oficialmente ata finais do ano seguinte. O seu nome non é casualidade, nos seus inicios, ademáis de balonmán, este clube tiña outras seccións: atletismo, ciclismo, hokey sobre patíns, ping pong... En 1965 conseguiu que se construira unha pista de cemento na Xunqueira e a finais dese ano tentaban conseguir a iluminación para poder entrenar de noite. En 1968 recibiu a Placa de Prata ao Mérito Deportivo. En 1969 ascenden a Primeira Provincial. Despois de 4 anos promocionando por fin en 1981 acadan o ascenso a Primeira Nacional. Na tempada 1997-98 quedou imbatido na Primeira División, promocionando na fase de ascenso á División de Honra B. Na 2007-08, acadou un novo ascenso a Primeira División e gañou a Copa Federación. Recentemente, recibiu un premio como mellor Clube Galego de Balonmán, destacando a súa laboura nas categorías base.

Da canteira destacar que chegou a loitar en categoría xuvenil polo Campeonato Nacional en 1985. Nesa mesma tempada o equipo do Instituto de Redondela, formado por xogadores da S.A.R., gañou o Campionato de España escolar xuvenil. En 1966 organizou a I Liga de Balonmán Infantil con 4 equipos. Na terceira edición competían 14 equipos todos de Redondela: Spakos, Lombardos, Hong Kong, Relámpagos, Spakos B, Senadores, Reboreda, 7 Leones, Cesantes, Sajamonde, Hong Kong B, Madia Luna, Halcones e Wikingos.

En 1967 formouse o equipo feminino, daquela patrocinado por Regojo. As precursoras deste deporte en Redondela foron: María Argentina González, Isabel Jiménez, Marcelina Túnel, Ceferina Saa, Josefa Pérez, María del Carmen Hermida, María del Carmen Hortas, María Rodríguez, María Albina Reboredo e María Hortas González. Entre os logros desta sección o primeiro ascenso á 2ª División en 1974 ou a clasificación para o Campionato Nacional xuvenil.

Tamén destacar neste clube ó directivo Javier Cordero que en 1985 recibiu a Medalla de Plata al Mérito en Balonmano otorgada pola Federación Española de Balonmano.

Curiosidades

Con motivo da celebración das Olimpiadas en Barcelona en 1992, xogouse un campeonato nacional de seleccións autonómicas de xuvenís, baixo o nome de Objetivo 92. O campionato foi retransmitido por TVE. O equipo que aportou máis xogadores á selección galega foi a SAR: Germán Muíños, Javi Orge, Xorxe Fontela, Daniel Virulegio, Domingo Pérez e Jose Orge.

 

A nivel organizativo en 1989 xogáronse, tanto en Redondela como en Chapela, partidos correspondentes ó Campeonato Mundial Junior. Daquela na selección española xogaba xente como Barrufet, Masip, Urdangarín ou Barbeito.

 

Galería da S.A.R.

Xogadores máis destacados.

 

 

Balonmán Masculino.

 

Amoedo, Francisco (Paquiño): Formado na S.A.R. acadou o ascenso á División de Honra (Asobal) 3 de Mayo. Tamén xogou nesta categoría co Octavio. Logo regresaría ao 3 de Mayo co que xogaría na División de Honra B e na Primeira División, retirándose con máis de corenta anos .

 

Ballesteros, Oscar: de Chapela. Xogou co SD Chapela en Asobal, fichando logo pola SAR en 1ªA.

Cabaleiro, Pablo: de Chapela. Xogou co SD Chapela en Asobal.

 

Pablo Docampo Foto www.eurohandball

Docampo, Pablo (Redondela, 17-5-1985): Nas tempadas 2007-08 e 2008-09 disputou a Challenge Cup co University of Manchester.

 

Fernández Costas, José Luis “Chof” (Chapela): Pivote. Xogou dende os 12 aos 26 anos no SD Chapela, co que xogou dúas tempadas en Asobal. Logo pasaría catro tempadas co Teucro, as dúas últimas en Asobal. No 2001 fichou polo Calvo Xiria, de Carballo, de Primeira División.


Xorxe Fontenla
Xorxe Fontenla co Octavio.

Ferreras Fontenla, Xorxe: De a S.A.R. deu o salto á Asobal da man do Teucro e o Octavio (1993-1994).

 

Leo co Octavio 1978-79
Leo co Octavio 1978-79

 

Juri, Leonardo (Leo): Pasou da S.A.R. a xogar na Asobal co Octavio e o equipo canario 3 de Mayo, co que acadou o 4º y 5º puestos, a Copa do Rei e disputou en dúas tempadas a Copa IHF. Destacar tamén que en 1984 participou no primeiro encontro da selección galega que perdeu fronte a España 36-9.

 

Eloy Krook Foto Web Frigorificos Morrazo
Eloy Krook Foto Web Frigorificos Morrazo

Krook, Eloy (Saxamonde): Lateral. Formado na canteira da S. A.R. Con 19 anos fichou polo Frigoríficos Morrazo, para a tempada 2011-2012, na que o equipo acadou o ascenso á Asobal.

 

Lago, Agustín (Tito): de Cesantes. Procedente da canteira da SAR, debutou co S.D. Chapela na Asobal. Logo tornaría á S.A.R.

Germán Muíños
Germán Muíños mellor porteiro Copa do Rei 1995.

 

 

Muíños, Germán: Porteiro. Da canteira da S.A.R. Xogou a Asobal co desaparecido Caja Madrid, Teucro e Octavio (1994-1998). Seleccionado Nacional B e nas categorías inferiores. Mellor porteiro da Copa do Rei de 1995. Co Octavio foi finalista da Copa do Rei 1995, 4º Liga Asobal 1996-97, 5º1995-96, semifinalista EHF 1996-97 e semifinalista Copa City.

 

Javi Orge
Javi Orge final Copa do Rei 1995.

 

 

 

 

Orge, Javi: Ademáis de na S.A.R. xogou no Lalín e xa en Asobal co Teucro e Octavio (1994-1997). Co Octavio foi finalista Copa do Rei 1995, 4º Liga Asobal 1996-97, 5º1995-96 e semifinalista EHF1996-97.

 

Quique Orge
Quique Orge o día da súa retirada.

 

 

 

Quique Orge: Central nado o 28-12-1974. Pasou de Primeira División, coa S.A.R. (1992-93), á Asobal co Octavio Pilotes Posada (1993-1994). Despois pasaría á S.D. Chapela (94-95 e 95-96) coa que ascendería á Asobal. Xogaría tamén na máxima categoría co Teucro (96-97 e 97-98) e outra vez co Octavio (98-99). Por motivos laborais ficha polo Xiria de Carballo co que xoga 1 tempada en Segunda e as 3 seguintes en Primeira. En febreiro do 2003 con tan só 28 anos deixa o balonmán para ir traballar ó Salvador.

 

Pérez Souto, Domingo (Mingui): Da S.A.R. Xogou en División de Honor co Teucro e co Lalín na División de Prata.

 

 

Pérez Souto, Rodrigo (Rodri): Irmán do anterior. Da S.A.R., xogou na Selección Española Junior.

 

Roberto Sánchez Bicho Foto: José Lores-Faro de Vigo
Roberto Sánchez Bicho Foto: José Lores-Faro de Vigo

Sánchez Figueroa “Bicho”, José (Chapela, 1990): Extremo esquerdo. Entrou a formar parte do D. B. Chapela con seis anos. Alí se formou pasando ao primeiro equipo cando aínda era xuvenil. En maio de 2013 fichou polo equipo da Asobal, Villa de Aranda.

 

Galería de xogadores de Redondela no Octavio (Vigo). Fotos da Páxina Oficial do Octavio.

 



Balonmán Feminino


Amoedo, Bibiana “Bibi” (A Portela-Cedeira): Xogadora procedente das categorías base da SAR, equipo no que xogaba como lateral. Fichou polo Porriño que militaba na División de Prata pasando a ocupar a demarcación de pivote. Con este clube acadou o ascenso á máxima categoría, na que xogou varias tempadas. En decembro do 2012 deixa este equipo para continuar os seus estudos no estranxeiro. Formou parte da Selección Galega Senior.

Araujo Otero, Alba Elvira: Porteira formada na canteira da S.A.R., fichou polo equipo xuvenil do Porriño, pasando logo ao senior co que xogaría na división de Honra. No 2008 marcha a Asturias, xogando co Universidad de Oviedo. Pouco despois voltaría ao Porriño. Convocada coa selección Galega Senior, coa que venceu no Torneo de Nacións Territoriais 2012, sendo elexida mellor porteira.

 

Baz Alonso, Carla (Redondela): Central da S.A.R. Pasou a xogar a División de Honra co At. Guardés, trocando a súa posición no campo pola de extremo dereito. Selección Galega Senior.

Loureiro, Sandra (Chapela): Xogou na División de Honra co Porriño, voltando despois ao Chapela, equipo no que se iniciou neste deporte.

 

Eva Piñeiro coa SAR

 

Piñeiro, Eva (Redondela, 1972): Porteira. Formóuse na canteira da S.A.R., deste equipo pasou ao Porriño, daquela na división de Prata. Logo emigrou a Holanda recalando no PSV de Eindhoven co que xogaría na División de Honra Holandesa. No 2012, con 40 anos de idade, afrontaba unha nova tempada neste equipo. Selección Galega Senior.

 

Prieto Miranda, Emma (Chapela): Lateral dereita. Do D. B. Chapela. Xogou en División de Honra co Porriño, voltando logo ao Chapela. Selección Galega senior.

 

Sío Martínez, Noemí: Central. Do D. B. Chapela. Selección Galega senior.

 

 

Texto: Juan Migueles

Actualizado: 26-03-2015

Escribir comentario

Comentarios: 0