Ciclismo

Finais S. XIX: Os inicios.

A primeira referencia á bicicleta en Redondela que atopo é cando en 1891 José Curbera Fernández relata unha excursión en bicicleta na que cruzan por riba do viaduto de Redondela: “Imponía respeto al atravesar por encima de sus planchas”.

En 1895 o dramaturgo, que anos despois acadaría o Premio Nobel, e ciclista activo José Echegaray, é invitado polo Centro Ciclista de Vigo. Daquela tiña a súa residencia en Marín de onde saiu en coche acompañado por varios ciclistas. En Redondela sumaríanse moitos mais ciclistas que o escoltaron ata Vigo.

En febreiro de 1896, celébrase unha carreira entre Vigo e Pontevedra, participando: Curbera, Del Río, Cantalapiedra e Solá. Vencería Curbera cun tempo de 1 hora e 19 minutos, aventaxando en dez minutos aos demáis participantes.

O domingo 29 de maio de 1898 26, ciclistas do Centro Ciclista de Vigo fan unha excursión a Redondela onde se fixeron fotografías nun restaurante. Encabezaba a comitiva o seu presidente, o notario Eugenio Domínguez, e pechaba o grupo o vicepresidente, José Curbera.

 

 

Principios do S. XX: Primeiras competicións.

En setembro de 1910 celébranse en Pontevedra diferentes probas organizadas polo xornal El Progreso, da citada vila, na que estaban inscritos máis de 60 corredores. O único redondelán participante, José Taboas Pardo acadou 3 fermosas cintas de outras tantas mozas da capital, quedando o segundo nas eliminatorias de velocidade.

En agosto do seguinte ano varios redondeláns compiten tamén en Pontevedra. Con motivo das festas celébranse probas de velocidade, resistencia e obstáculos. Nesta última vence Manuel Leirós, de Redondela, que será premiado con cincuenta pesetas e unha medalla.

En 1928 celebrouse o I Campionato Galego cun itinerario de 122 km. que comprendía Vigo, Redondela, Porriño, Tui, A Guarda e Vigo. Nestas vilas colocáronse controis realizados polos clubes de futbol, no noso caso o Redondela F. C. Este trazado repetiuse no campionato de 1929, sendo vencedor nas dúas ocasións Manuel Rosales de Marín. En 1930 co percorrido xa habitual gañou Bermúdez.

En 1933 os cohetes e a banda de música saúdaba o paso dos participantes da Volta a Pontevedra por Redondela.

O 3 de setembro de 1933 celébrase a Calvario-Redondela-Porriño-Calvario, gañada polo corredor de Ponteareas, Delio Rodríguez, e na que queda 6º Fernando Covelo, de Chapela e 7º Ramón Covelo, tamén de Chapela.  O 2 de xuño de 1935 o propio Ramón Covelo queda 2º na Vigo-Pontevedra-Vigo co mesmo tempo que o gañador Bernardo Longa, 3h 1min 30s para 60 km

O 17 de setembro de 1933 celébrase a I Volta a Chapela, co percorrido Chapela-Vigo-Lavadores-Porriño-Redondela-Chapela. As bases da proba establecen que só poden participar menores de 20 anos e que a liña de saída e meta estará ubicada diante do salón-baile La Luz del Día. Os premios foron entregados o día 18 en dito salón por Miss Salón La Luz del Día, durante un baile no que actuaron tres orquestras. A carreira é gañada por Manuel Rodríguez, de Porriño, quedando 2º Ramón Covelo, 3º Fernando Covelo e 11º Edelmiro Pérez, todos de Chapela.

O 10 de xuño de 1934 ten lugar a II Volta Ciclista a Chapela, na que participa Julián Moreira del Río, de Redondela. O percorrido sería Chapela-Pontevedra-Marín-Cangas-Vilaboa-Redondela-Chapela. O vencedor sería Manuel Parente, de Pardavila, seguido polo famoso Delio Rodríguez. O primeiro dos nosos sería Ramón Covelo no sétimo lugar.

En xuño de 1934, Ramón Covelo e Julián Moreira participan nunha proba en Angoares (Ponteareas), para a que uns afeccionados de Redondela ceden unha copa como prima para o primeiro en pasar pola nosa vila.

A finais dese mes o citado baile La Luz del Día cede para a proba co trazado Calvario-Redondela-Porriño-Calvario, dúas botellas de cognac para o primeiro ciclista de Chapela que pase por alí. Esta  II Volta do Calvario, sería gañada novamente por Delio Rodríguez, quedando Ramón Covelo 4º e Julián Moreira 6º.

Un mes despois celébrase unha carreira infantil, cun trazado que hoxe en día parece unha tolería, Vigo-Redondela-Vigo.

            Tamén en 1934 celébrase a Volta a Rande. O percorrido sería Rande-Vigo-Porriño-Redondela-Rande.

            En decembro de 1934 celébrase a Traviesas-Baiona-Traviesas, participando José Pío Cabaleiro, de Chapela.

            Con motivo do primeiro de maio, en1935 celébranse probas ciclistas en Redondela. Na chegada á meta, un ciclista sufriu unha caída. O coche que viña tras el ao tentar evitalo lánzase contra o público atropelando a varios espectadores, co resultado dun ferido grave e varios leves.

            Tamén en maio de 1935 o redondelánSantiago Rubín é o gran animador do Gran Premio de Corpus, co itinerario Vigo-Óurense-Vigo. Proba moi esixente, na que tomaron parte 20 corredores e remataron 9.  Por desgraza atopábase entre os que tiveron que abandoar, porque sufriu unha caída baixando Fontefría cando ocupaba a segunda posición e despois de gañar a prima de Ourense. Os xornais da época califícano como bo corredor, pero a verdade é que non tiña sorte. Nese mesmo ano retírase por caída da II Volta a Galicia, por calambres do G. P. Apóstol (Vigo-Santiago-Vigo) e por golpearse ao atropelar a un neno na Coruña-Vigo-Coruña. Tamén participa nunha proba do Velo Club de Vigo e no Cto. Galego de Fondo.

            En xuño, celébrase a Vigo-Pontevedra-Vigo, sendo gañada por Bernardo Longa, rematando 2º Ramón Covelo e 5º José Pío.

            Nese mesmo mes o Velo Club Vigués organiza unha proba con percorrido: Vigo-Porriño-Pontevedra-Chapela-Vigo. Vence Bernardo Longa, chegando co mesmo tempo Ramón Covelo, de Chapela, quen tivera que deterse dúas veces por averías e unha terceira para cambiar de bicicleta. O resto de clasificados serían: 3º José Luis Maron, 4º Inocencio Zúñiga, 5º José Pío Cabaleiro, de Chapela e 6º José Álvarez Rivero.

            En outubro de 1935, José Pío, de Chapela, queda 5º na Volta á Garda.

Antes do inicio da Guerra Civil, o 5 de xullo de 1936, celébrase a II Volta a Rande, para corredores non federados. Entre os participantes había equipos de Rande, Chapela e Redondela. Resultou vencedor Manuel Cruces, de Santiago.

 

Guerra Civil

Ao quedar Galicia lonxe da fronte de combate despois dos primeiros meses, retómase a celebración de competicións rexionais. En setembro de 1938 o Celta organiza a proba Vigo-Porriño-Redondela-Vigo, na que de 42 participantes, clasifícase 5º o redondelán, José Estévez Rodríguez, gañando copa e 10 pesetas. Os dous primeiros serían José e Pastor, irmáns do famoso Delio Rodríguez.

 

 

Posguerra

Trala Guerra Civil xurden novas carreiras que atravesan Redondela como as organizadas pola Sociedad Ciclista de Vigo,  Educación y Descanso ou, posteriormente a Volta ao Morrazo.

En maio de 1940 celébranse en Redondela unha probas infantís organizadas por Argentino Rubín e que consisten en varias voltas ao campo de Petán.

En 1941 volta a organizarse o Campionato Galego de Afeccionados, que pasa pola nosa vila.

En 1944 celébranse probas ciclistas durante as festas da Coca.

No G. P. de Navidad de 1949, con percorrido Vigo-Bouzas-Porriño-Vigo, o redondelán Rivera acada o 8º posto, apesares de chegar tarde e participar con vestiario improvisado.

 

Anos 60: A Sociedade Atlética de Redondela

O primeiro equipo ciclista redondelán do que teño constancia foi o equipo de ciclismo e ciclocross afeccionado S.A.R. Debutou en setembro de 1964 con vitoria nunha proba en Porriño. En 1965 organizou o “I Trofeo S.A.R.” e o Campionato Galego de Fondo de Afeccionados (colaborando o Club Ciclista Vigués). No 66 o “Campionato Provincial” ámbalas dúas en categorías de ciclo cross afecceonado e xuvenil. Entre os seus compoñentes contaba con: Horacio Barros (natural de Porriño, campión provincial de fondo afeccionado; e provincial e galego de Ciclo Cross en varias ocasións), Alfonso Barcelo (de Porriño, 2º no Cto. de España de ciclocross de 1966), Cándido Lago (de Redondela, 5º no Cto. de España de ciclocross de 1966), Juan Rafael Rodríguez (de Porriño), Domingo García (Campión Galego xuvenil), José María Longueira, Raúl Fernández, Eladio Díaz, Eduardo Parada, Fermín Bouzón Couñago (de Redondela, en 1969 formou parte da selección galega no “Campeonato de España de Montaña para aficionados”, anteriormente xa gañara varias probas como xuvenil), Alejandro Casal Castro, Manuel Pérez...

 

 

Finais do S. XX

Anos despois na categoría cicloturista formariase o clube Redociclo, e como  equipo ciclista afecceonado, o Pescanova Chapela. Deste último sairían os nosos ciclistas máis destacados.

A proximidade con Vigo impide a organización de saídas e metas en grandes voltas, pero do mesmo xeito, provoca que sexa un lugar de paso habitual da Vuelta a España e da Volta a Galicia. Como curiosidade dicir que tamén ten pasado por aquí a Volta a Portugal, como sucedeu en 1965.

A nivel organizativo o máis destacado foi en 1988 a saída da 5ª e derradeira etapa Redondela-Vigo da Volta a Galicia. Esa etapa sería para Acacio Da Silva e a xeral sería para Marino Lejarreta seguido por Álvaro Pino e, un aínda descoñecido Miguel Indurain. De tódolos xeitos, aquel día o autógrafo máis codiciado era o de Pedro Delgado.

Outros premios: En 1987 un sprint especial da Vuelta a España sería gañado por Antonio Esparza. En 1984 sería Jose María Caroz do equipo Dormilón o que se adxudicaría unha meta volante. En 1954 un sprint da Vuelta Ciclista a Pontevedra y el Ribero sería para Poblet.

Actualidade

No 2008 un grupo de xóvenes redondeláns comezou a construcción dun circuito de BMX nos montes de Cedeira. Un destes mozos xa acadra un Campionato de España.

Tamén nos derradeiros anos vense organizando a Marcha B.T.T. La Luciérnaga. A afeción pola bicicleta de montaña fai que nazan clubes de afecccionados como Pa Casa. No 2013  nace un equipo que compite na Élite-Sub23 o Racing Ciclyng Team GD, no que está involucrado o ex-profesional Enrique Salgueiro.

http://elmundodemibici.blogspot.com.es/

Tamén no 2013 créase en Chapela a Escola de Ciclismo de Redondela, dirixida polo tamén profesional retirado, Marcos Serrano.

http://escolaciclismoredondela.blogspot.com.es/

 

CICLISTAS

Os ciclistas do noso Concello que chegaron ao profesionalismo foron:

 

 

Marcos Antonio Serrano Rodríguez: (Chapela 8-9-1972). Deu o salto a profesionais en 1993 co equipo Kelme. Axiña se destacaría coma un gregario de luxo e un gran escalador. Pasou polas filas do ONCE-Eroski, Liberty Seguros e Karpin Galicia. Retirouse en febreiro do 2008.

No seu palmarés figuran unha etapa no Tour de Francia (2005), a Milán-Turín (2004), a Volta a Galicia (1999) e  a Volta a Castela e León (2001). Chegou quedar décimo tanto no Tour de Francia como na Volta a España. ¡E iso que non era xefe de filas! Un gran ciclista que, cun pouco máis de fortuna e confianza dos seus directores deportivos, podería haber acadado un palmarés aínda máis embexable.

 

Marcos tras gañar a 18ª etapa do Tour 2005
Marcos tras gañar a 18ª etapa do Tour 2005
Enrique Salgueiro
Enrique Salgueiro

Enrique Salgueiro Alonso: (Chapela 2-05-1981). Debutou en profesionais no 2003 co equipo Beppi-Pepolim (Portugal). No 2005 pasaría ó español Spiuk Semar e no 2007 ó Karpin-Galicia. No 2008 voltou ó Extremadura-Spiuk que pouco despois sería descendido a categoría amateur. No 2012 volta a profesionais co equipo portugués La Aluminios Antarte. No 2013 ficha polo Rías Baixas e pouco despois embárcase na aventura do xa citado equipo redondelán Racing Ciclyng Team GD

No seu palmarés como profesional conta cunha etapa e xeneral da Volta a León e con outra etapa e xeneral na francesa Volta ós Pirineos. No 2009 como amateur liderou de principio a fin a Volta a Galicia.

http://elmundodemibici.blogspot.com/


 

David Abal
David Abal. Foto: xacobeogalicia.org

 

David Abal Diego: (Chapela 25-08-1986). Campión galego de BTT, campión de España de Ciclocross no 2002 e campión galego de fondo e contrarreloxo no 2005 e 2006. Correu como profesional no Karpin-Galicia as tempadas 2007 e 2008, esta última co nome Xacobeo Galicia. Nas tempadas 2009 e 2010 forma parte do equipo amateur Cueva el Soplao.

 

BMX

Texto: Juan Migueles

Actualizado: 03-07-2015

Escribir comentario

Comentarios: 0